پير آقا محمد اسماعيل جان، مولانا: ناميارو شاعر ۽ هڪ سياسي اڳواڻ پير آقا محمد اسماعيل جان ولد پير آقا محمد حسين جان جو جنم 24 جون 1890ع تي ٽکڙ ضلعي حيدرآباد ۾ ٿيو، هن ابتدائي تعليم علامه يوسف کان ورتي، ان کان پوءِ محمد هارون دلگير کان قرآن مجيد، سنڌي، فقه ۽ فارسي پڙهي فارغ التحصيل ٿيو، هن پنهنجي سياسي زندگيءَ جو آغاز تحريڪ خلافت کان ڪيو، هن ان تحريڪ ۾ خلافتي عالمن جي جاري ڪيل فتوائن جي تصديق ڪئي ۽ ان تحريڪ لاءِ انگوره فنڊ ۾ مالي مدد پڻ ڪيائين ان کان سواءِ هو جميعتي عالمن مان هو ۽ جمعيت العلماءِ ۾ رهي وطن جي آزاديءَ لاءِ جدوجهد ڪيائين. سندس ئي ڪوششن سان ميرپور خاص ۾ جمعيت العلماءِ جي شاخ قائم ٿي ۽ پاڻ ان جماعت جو باني صدر بڻيو، ان کان پوءِ هن مسلم ليگ ۾ شموليت اختيار ڪندي، هن تحريڪ ۾ ڀرپور حصو ورتو. ”مسجد منزل گاهه“ واري مسئلي کي هٿ ۾ کنيو، هو سياستدان هئڻ سان گڏ شاعر، ليکڪ به هو، شاعريءَ ۾ سندس تخلص ”روشن“ هو. سندس تصنيفن جو مختصر وچور هن طرح آهي: (1) ديوان روشن (فارسي)، (2) انشائ روشن وخطبه هائ نظم ۽ نثر (فارسي)، (3) نسيم چمن در تتبع نفحة اليمن (فـارسـي)، (4) جـواهـر نفسيه (تصوف بابت)، (5) ديوان روشن (سنڌي) ۽ (6) خطبات سنڌي (منظوم). مولانا، پير آقا محمد اسماعيل جان، 14 جماد الثاني 1361هه بمطابق 29 جون 1942ع ۾ وفات ڪئي.
1890.06.24 عيسوي
پير آقا محمد اسماعيل جان ولد پير آقا محمد حسين جان جو جنم 24 جون 1890ع تي ٽکڙ ضلعي حيدرآباد ۾ ٿيو،
1942.06.29 عيسوي
مولانا، پير آقا محمد اسماعيل جان، 14 جماد الثاني 1361هه بمطابق 29 جون 1942ع ۾ وفات ڪئي.